-ازيك يا عمي
= ازيك يا بني عامل إيه؟
-الحمد لله بخير والله يا عمي..
-معلش يا عمي ندخل في الموضوع علطول، أنا على قدر من الانطوائية، والأمر دا محرج جدا كمان لمن هو اجتماعي فما بالك بمن هو انطوائي مثلي، لكن تميم بيقول: "يقول لك المجرّب كل حرب لها طرفان دوما خائفان.. وخوف المرء يدفعه أماما فيظهر كالشجاعة للعيان.. ترى الجيشين من خوف المنايا عليها يقدمان ويحجمان بكل حديدة طنت ورنّت وكل مكيدة يتسلحان"
= يعني إيه؟
-لا يا عمي أنا مش جاي أشرح لك أبيات تميم، وبعدين هتفهمها عملي دلوقتي... بص يا عمي أنا جاي أتقدم لبنتك بسنت، بسم الله ما شاء الله، أخلاق وتدين حاجة يعني مبهرة..
= وانت شفت أخلاقها وتدينها فين يا ابني؟
-الحقيقة يا عمي أنا مشفتهمش، هي بسنت حلوة علشان كدا جيت أتقدم لها مش أكتر.. إنما التدين في القلب هشوفه ازاي يعني.. بس دي كليشيهات في الأول كدا..
= طيب يا ابني.. انت أهلك فين؟
-أنا جاي في الأول كدا جَس نبض، ولو حضرتك وافقت هجيب أهلي وانت تجيبوا أهلكم.. أنا أجيب عمي هي تجيب عمها.. ونعمل تسويق شبكي وكل اللي حضرتك عايزه..
= طيب يا ابني انت معاك فلوس؟
-سؤال مادّي أوي يا عمي... بقى دا أول سؤال تقوله في أول قاعدة كدا؟ معايا فلوس يا عمي أكيد، أمال علبة الجاتوه اللي بسنت وأمها بياكلوا فيها في المطبخ دي جايبها منين.. دا حتى مفكروش يسيبوا لحضرتك قطعة لما نخلّص محضر التحقيق دا..
= طيب يا بني بالنسبة للجهاز يا حبيبي.. انت عليك النجف والسجاد والخشب والنيش والمطبخ والغسالة والتلاجة والبوتاجاز..
- طب وانت لسه عليكم إيه كدا يا عمي؟ الستر! بص يا عمي أنا معايا فلوس آه بس مش للدرجادي.. أنا الفلوس اللي كانت معايا جبت بها الجاتوه خلاص..
= مش انتم اللي قارفينا على السوشيال ميديا بحوار متمضيش على القايمة.. هات الحاجة كلها بقى.. وبعدين المفروض أجوز بنتي من غير جهاز يعني!
-لا يا والدي، معاذ الله.. بس حضرتك سمعت عن الطب البديل من قبل!
= آه!
- يا عم بترد ليه! بترد ليه! دا مش استفهام تقريري.. انت مكنتش بتذاكر ولا إيه يا عمي! ما تخليني أكمّل الجملة..
-هنعيد المشهد تاني علشان انت بوظته يا عمي..
-حضرتك سمعت عن الطب البديل.. أنا بقى عندي فكرة زي الطب البديل كدا اسمها الجهاز البديل..
= بمعنى؟
-عارف العرب كانوا بيسقعوا الحاجة زمان ازاي؟
= هما كانوا بيسقعوها؟
-آه، أمال فاكرهم كانوا بيشربوا بيرة سخنة يعني! كانوا بيشربوها فيها تلج طبعا يا عمي لما بيروحوا البار في الجاهلية..
= هما كمان كان عندهم بار؟
- أمال يا عمي! متدخلنيش في تفاصيل وخلينا في فكرة التبريد قديما..
بص يا عمي.. العرب كانوا بيحفروا في الصحرا وبيعملوا شكل مخروطي.. ارتفاعة فوق الأرض مقدار طابقين وتحت الأرض مثله.. فيه فتحه من فوق وفتحة من تحت.. اللي تحت بتدخل الهوا البارد واللي فوق بتطلع الهوا الساخن.. فيتكون التلج جوه المخروط..
فأنا وبسنت هنعمل كدا مؤقتا إن شاء الله وربنا يسهّل يعني.. وبعدين نبقى نحوّش للتلاجة بعد الزواج.. وأصلا هتكون غليت على ما نجمّع حقّها أصلا.. انت عارف تجميع الـ pc بقى بكام يا عمي، والتجميعة الاقتصادية كمان ما بالك لو تجميع games.. عايز أقولك إن كيس السكر شوية وهيبقى سعره من سعر التجميعة يا عمي... انت مش متابع حركات التعويم ولا إيه؟
= وانت يا بني جايب الثقة دي كلها منين إني هوافق على الكلام دا! مش أنا حتى يا أخي، جايب الثقة منين إن بسنت نفسها توافق على الكلام دا، دا انت شفتها وجيت تتقدم لها، يعني حتى متعرفكش، ليه تتحمل كل التعب دا!
- منا قلت لك يا عمي تدينها وأخلاقها اللي جذبوني لها.. وبعدين يا عمي انتوا عيلة محترمة.. وانت رجل على خُلق.. هتفكّر في الغيب.. حد عارف الغيب شايل لنا إيه؟ ما يمكن أنا وبسنت وأحنا بنحفر في الصحرا علشان نعمل المخروط ونسقّع المياه نلاقي حتة آثار.. وبسنت تكلم عمها.. وأنا أكلم عمي... ونعمل تسويق شبكي برضه يا عمي وأهي هتمشي.. حضرتك مش متابع رسايل عمك لقى حتى آثار وعايز حد يصرّفها.. الأيام دول يا عمي...
= طيب يا بني، لو تجاوزنا التلاجة.. الميكرويف هتجيبه ازاي!
- هخه يا عمي، انت هتسأل على جهاز جهاز بقى! وكل جهاز المفروض أألف له قصة، الناس عندي بتزهق ومبتحبش المنشورات الطويلة انجز يا عمي! لكن عموما الحب اللي بينا فيه قدر من الدفا كافي يسخّن أي أكل بارد.. الميكرويف بيعمل حاجة أكتر من كدا؟ وبعدين ما تسخن على البوتاجاز يا عمي.. هو لازم ميكرويف.. هو كان في ميكرويف أيامك يا عمي..
= طيب كويس يا بني إنك جبت سيرة البوتاجاز.. وبما إنك قلت هتسخن عليه بدل الميكرويف يبقى أكيد هتجيبه!
- شوف وأنا بقول عليك رجل متدين ومؤمن.. هو كان في بوتاجاز زمان يا والدي؟ أيام الزمن الجميل، أيام ما كانت الدنيا لسه بخيرها.. قبل الحداثة والقرف..
عايزين نرجع للطبيعة.. بعد ما نحفر البير أنا وبسنت يا عمي واحنا راجعين في الطريق هنبقى نقطع شجرتين نسخّن عليهم الأكل.. واوعى تسألني هتجيب أكل منين.. كدا هندخل بقى في تسلسل وهتبقى شبه المقطوعة اللي كنا بنقولها في الطفولة " 3 معالق ع السفرة
واحدة تزن ...وواحدة ترن...
وواحدة تقول يا ماما: عاوزه مكرونة ..
والمكرونة في النملية...
والنملية في العربية ....
والعربية عاوزة فلوس....
والفلوس عند الفلاح ....
والفلاح عاوز تفاح....
والتفاح فوق الشجرة.....
والشجرة عاوزة ميه...
والميه في الحنفية....
والحنفيه مصدية...
اخص عليك يا حنفية! "
شايف الموضوع بدأ بإيه يا عمي؟ بدأ بـ 3 معالق على السفرة، والناس عايزه تاكل.. لكن يحصل تسلسل يا عمي يمنع إن أصحاب الـ 3 معالق دول ياكلوا أو يجدوا الأكل! شايف ودي مقطوعة كنّا بنتغناها في الطفولة.. مش عارف ليه طفل يقول في طفولته كدا..
فاخص عليك يا عمي عايز تقفلّها علينا زي الحنفية؟
= طيب يا ابني بالنسبة للفرش هتعمل إيه؟
- إيه يا عمي انت معندكش عقدة الخواجة ولا إيه؟
= انت يا بني عايزني يبقى عندي عقدة الخواجة.. ولا أبقى عربي وأفتخر ولا أبقى كيمتي ولا أرجع لأيام الزمان الجميل قبل الحداثة.. ما تثبت على حاجة!
- والله يا والدي الموضوع راجع للسياق وبما إنك مبتذاكرش وعندك عقدة الخواجة فأنا مؤمن في موضوع الفرش دا بالـ minimalism
لذلك شايف إن مرتبة محطوطة على الأرض هتبقى كويسة أوي وتكفيني أنا وبسنت.. أهم حاجة الحب.. كل الحاجات التانية دي كماليات.. واحنا اللي بنفضل نعقدها ونصعبها على بعض يا عمي..
= طب الحمد لله والله يا بني إنك هتجيب مرتبة!
- شايف يا حاج... أسلوبي في الحوار ونزولي بسقف توقعاتك خلاك تحمد ربنا إني هجيب مرتبة.. ولسه يا عمي هبهرك..
= انت قلت المرتبة هتحطها على الأرض.. يعني عندك شقة تحطها فيها على أرضها أكيد صح؟ يا ترى تمليك ولا إيجار؟
- أنا قلت هحطها على أرض الشقة! أنا قلت هحطها على الأرض وأطلقت.. والله شكلك مكنتش بتذاكر يا عمي..
= يعني إيه يا ابني، هتحطوا المرتبة على كوكب الأرض يعني ولا إيه! هو حد قال لك إن بسنت دي لقيطة، أو إني لقيتها عند باب جامع وهي صغيرة؟
- بالراحة يا عمي.. هنسكن في شقة على الطوب الأحمر.. ما أنا مؤمن بالـ minimalism ..
اكتب minimalism على جوجل هتلاقي أجانب بيناموا في شقق كدا وهما أغنية يا عمي.. لكن أهم حاجة البساطة.. انت معندكش عقدة الخواجة ولا إيه!
ولا بنقلدهم في الشذوذ بس..
= يعني هتتجوزا في شقة على الطوب الأحمر وتشطبوها بعدين؟
- لا هي هتفضل كدا علطول.. ادعي بس أصحابها ميرجعوش من السفر ويشطبوها يا عمي.. وقتها أنا وبسنت هنحط المرتبة على الأرض حرفيا.. ممكن بقى وقتها ننام جنب المخروط اللي عملناه.. بدل ما نمشي من الصحرا للشقة ومن الشقة للصحرا بهدلة برضه...
= طيب يا ابني أنا ليه مجبر أعمل في بنتي كدا؟ وبعدين عمال تقولي انطوائي وما انطوائي.. أمال لو كنت انبجاحي كنت هتعمل فينا إيه بقى!
- ما انت لو فهمت أبيات تميم اللي قلتها لك في الأول يا عمي، مكنتش هتقول كدا.. ما انت لو كنت بتذاكر يا عمي..
- طيب يا عمي بما إنك مش مقتنع بموضوع الـ minimalism وقعدة الخواجة.. نرجع للعربي الأصيل تاني..
إيه يا عمي.. انت مش عربي أصيل ولا إيه؟ ولا عندك عقدة الخواجة.. والله شكلك عندك عقدة الخواجة..
تميم يا عمي في قصيدة كما ترى قال " نبني خيام لأننا عرب.. تثير فينا البيوت أشجانا"
وفي قصيدة تقبيل قال " ورثت عن أجدادي ترحلهم.. أصنع حيث ارتحلت أوطاني"
أنا وبسنت هنبني وطنّا زي ما نحب يا عمي.. زي الطيور..
= يا بني انت لا معاك جهاز ولا شقة ولا وظيفة ولا فلوس.. قل لي ميزة واحدة تخليني أوافق عليك
- أنا خريج كلية هندسة يا عمي.. أصعب كلية في مصر..
= هي دي مؤهلاتك!
- أمال، دا أنا كفاية عليّ أوي كدا
= بص يا بني أنا مش موافق على الموضوع دا...
- ما تاخد رأي بسنت يا عمي في الموضوع.. مش رأي العروسة أهم حاجة ولا بتحجروا على رأيها ولا إيه؟ دا احنا في عصر المرأة والفيمنست يا عمي.. ولا انت معندكش عقدة الخواجة!
= ماشي يا بني، هسألها وأرجع لك..
- ها قالت لك إيه يا عمي؟
= هي كانت قاعدة وسامعه الحوار كله.. بتقولي إديله حسنتة ومشيه..
- تمام أوي يا عمي.. طيب هات تمن الجاتوه يا عمي علشان ممعيش فلوس أركب مواصلات وأرجع الفلوس كلها صرفتها على الجاتوه..
= مش عاملي في كيمتي وبتعملي مخروط في الصحرا.. اركب لك أي عجلة حربية وانت مروح بقى يا حبيبي
- لا مسمحلكش يا عمي.. أنا عربي وأفتخر.. انت مبتسمعش أبو عبيدة ولا إيه.. هستأذنك يا عمي بقى علشان راكن الجمل صف تاني وممكن يتكلبش..
= أبو عبيدة بيركب عربية دفع رباعي يا معفّن
-اشمعنا دي اللي مذاكرها يا عمي.. أما صحيح مادّي
أنا هقولك كلمة واحدة بس يا عمي.. يعلم الله والأيام شاهدة أنا كرام ولكنّا مفاليس.