اذكروني عند موتي (اذكرني بخير)

 في مفهوم كدا اسمه المنحنى الاعتدالي، المنحنى دا بيقول لك مثلا في حالة الذكاء إن معظم الناس متكدسة في النص، يعني معظم الناس ذكائهم في المتوسط، وعلى الشمال في ناس أغبية أوفر ومتخلفين بس دول ندرة، وعلى اليمين ناس أذكياء جدا وخارقين، والمفاجأة إنك مش في الاتنين غالبا، أنت في القمة اللي نص الشكل، اللي هو انت شخص عادي خالص، تبص على شمالك تحمد ربنا إنك مش متخلف، تبص على يمينك تلاقيهم بيبصوا لك وبيحمدوا ربنا إنهم مش عاديين زيك يا متوسط الذكاء، مش موضوعنا الحوار دا والله.

اللي عايز تقتنع به المرأة الجميلة، اللي هي نصف المجتمع، واللي منقدرش نزعلها أبدا أبدا، واللي لو معايا فلوس هعمل تمثال للمرأة قدام البيت عندنا لأنها أجمل حاجة موجودة على كوكب الأرض بعد القطط، لكن مع احترامي للمرأة يعني واحترامي لمشاعرها، في منحنى اعتدالي، مش أنا اللي عامله والله في الأساس، دول بتوع الإحصاء، روحي حسبني عليهم يا مرأة، بس أنا اللي عامل بتاع الجمال دا، بيقول إيه بقى؟ نفس فكرة الذكاء بالضبط، وزيه زي أي منحنى اعتدالي، معظم الناس عاديين، يعني غالبا حضرتك عادية، آه والله، وعلى شمالك شوية بنات قليلين وحشين تحمدي ربنا إنك متولدتيش عندك تشوهات، وعلى يمينك ناس جميلة بمعنى كلمة جميلة، بيحمدوا ربنا إنهم مش عاديين زيك. 

اللي عايز حضرتك تعترفي به إنك عادية عادي، دا أمر لا يقل من قدرك تماما، لأنك الحمد لله مش قبيحة، وكلنا والله في نفس المكان دا وراضيين عادي، يعني أنا مش في أقصى اليمين بحيث أقدر أوصف نفسي بالوسيم مثلا، وإن كنت أكيد أتمنى دا، كنت أتمنى أكون شبه أحمد عز مثلا، بس بتاع الحديد علشان معاه فلوس مش الممثل، ولتذهب الوسامة إلى الجحيم، مش موضوعنا أختي في الله، الشاهد إن الإنسان متصالح مع كونه مش في الجانب الأيمن من المنحنى الاعتدالي، وإنه شخص عادي متكدس في منتصف الشكل مع معظم الناس العاديين وإننا طيف كبير جدا والأكثر عددا وفي تفاوت في العادية، لكن أنا عادي في النهاية، وبحمد ربنا إني عادي مش دميم، بحمد ربنا إني مش مشوّه، لو الوسيط بيسألني وصفك إيه علشان أقول للعروسة، بقوله شكلي عادي، والله العظيم عادي مش وسيم. 

فالشاهد ارحمي اللي خلفونا ولما تكلمي الوسيط وانتِ عادية قوليله إنك عادية، متقوليش إنك على قدر من الجمال، وانت في نص المنحنى، لو انت جميلة هتبقي أقصى اليمين ومع النوادر، عايزة تعرفي حاجة زي دي يبقى محتاجة هيئة محلفين اللي بتبقى في المحاكم الأمريكية دي، كلهم يقسم بالله إنك جميلة، الذكي النابغة بيبقى معروف إنه ذكي نابغة، فعادي والله تبقي عادية، مش مشكلة، كلنا عاديين ومقلناش حاجة. 

بلاش لما تملي فورم تكتبي فيها إنك على قدر من الجمال، أو جميلة جدا ما شاء الله، ورأي المرأة في المرأة ساقط، ورأي الأم أيضا، لأن القرد في عين أمه غزال، لازم هيئة محلفين زي ما قلت لك. 

قولي إنك عادية علشان المتقدم ميرفعش سقف توقعاته، وقول إنك عادي علشان العروسة مترفعش سقف توقعاتها.

اخرج من القسمة دي لو انت شبه أحمد عز بتاع الحديد علشان الراجل مبيعيبهوش غير جيبه.

أما بالنسبة للمرأة مش هقدر أدي مثل بصراحة علشان كله هيروح يبحث في جوجل وأنا اللي هشيل الذنب. 

بالتوفيق❤️

تعديل المقال