اذكروني عند موتي (اذكرني بخير)

- ازيك يا دكتور آية، يا رب تكوني بخير، كنت عايز منك رقم بابا!

= ليه؟

- إيه الإحراج دا، ما حاجة بدهية يعني، أكيد يعني مش عايزه علشان أشتكي له إن كل مرة باجي أقيس الضغط بتجيبي جهاز السكر، انتِ داخلة صيدلة من أدبي ولا إيه؟ .... كنت عايز أتقدم لك عادي.

= طيب هات رقم حضرتك وأنا هخليه يكلمك معلش.

- دا أغرب طلب في الحياة، هي الآية معكوسة، بس ماشي رقمي ********010

= إيه دا، كل دي أدوية اكتئاب انت ساحبها، انت بتاخد مضاد اكتئاب من تانية ابتدائي، كنت شايل هم إيه وقتها؟

- فين دا؟

= بص على السيستم أهوه، لما بحثت برقمك.

- إيه دا؟ انتوا مسجلين اسمي على السيستم "البائس"!

= أنا آسفة مش هقدر أدّي الرقم لبابا خلاص.

- يعني لما طلبتِ رقمي كان دا فخ علشان تشوفيه على السيستم، وتشوفي تاريخي المَرَضي؟!

= مش فخ ولا حاجة، كلهم بيعملوا كدا.

- كلهم! يعني كدا خلاص مش هقدر أتجوز أي واحدة من زمايلك في الصيدلية هنا؟

=الصيدلية هنا! دا انت طيب، مش هتقدر تتجوز ولا واحدة من فروع الطرشوبي كلها قاطبة، السيستم واحد في كل الفروع ومسمّع.

- بتهزري طب والحل؟

= شوف لك بقى أي حاجة تانية، شوف سلسلة صيدليات سالي.

- اشتريت منهم.

= العزبي؟!

- اشتريت منهم

= طب صيدليات سيف!

- اشتريت منهم

= صيدليات Care؟!

- اشتريت منهم.

= يا اسطى بالطريقة دي الوقتي نزلوا منك تحذير على صفحة نقابة الصيادلة.

- طب والحل؟

= غيّر التخصص.

- تمام، ممكن علبة بروزاك، وسجليه باسم إبراهيم حامد، ودا رقمه ********010 واحذفي اسمي من السيستم.

تعديل المقال